Тэр охин нөхөртэй, бас хүүхэдтэй. Тэднийхээ төлөө, бас ээжийнхээ төлөө л үдшийн бүрийгээс өглөөний наран мандах хүртэл ажиллана. Шөнийн ээлжинд ихэд ядарна. Гэвч тэр их сэргэлэн цовоо, хөгжөөнтэй, алиа хонгор ааштай. Ажилдаа махруу бас ч зарчимч. Нэг өдөр шивээс хийлгэжээ. Хөөрхөн багваахай цэцэг шивүүлсэн нь ил тод биш, өөрт нь ямар нэгэн учир утгыг илэрхийлж байсан нь ойлгомжтой. Хүнд харагдахааргүй газар шивүүлсэн нь тийм ч чухал биш, ил газраа ч шивээс хийлгэх нь хувь хүний дурын асуудал. Гэтэл нөхөр нь уурлаж, шивээстэй хүнтэй амьдрахгүй гэж түүнийг дарамтлан шивээсийг нь арилгуулжээ. Арилгана гэдэг амаргүй, арьсыг нь лазераар улаан нялга болгосон нь тодорхой. Дахиж 2-3 удаа ингэж арьсыг нь мулзалж байж шивээсийг бүрмөсөн арилгана гэнэ.
Энэ бол хэдий тухайн гэр бүлийн асуудал ч гэлээ, миний дургүйцлийг хөдөлгөөд зогсохгүй, яаж ч чадахгүйдээ уурсан амаа ангалзуулан хоцорлоо би. Эрэгтэй хүн авч суусан гэргийгээ өмчилж авсан боол мэт үздэг энэ нийгэм хэзээ ч хөгжихгүй. Өөрөөс нь ахиу цалин авдаг гэргийгээ дарамтлан, элдвээр хараан зүхэж, хардаж доромжилдог эрэгтэй хүмүүс Монголд дүүрэн байгаа цагт улс маань хэзээ ч хөгжихгүй. Гэргийнхээ ажил хийж хүний өөдөөс гөлөлзөн барин олж ирсэн хэдэн төгрөгийг нь архинаас өгөөд хөлчүүрхээд сууж байдаг эрчүүд байгаа цагт бид хэзээ ч жаргахгүй. Ханилж суусан бяцхан хатагтайгаа яагаад бага ч болов эрхлүүлээд, хайрлаж халамжлаад байж болдоггүй юм бол оо? Цаг тутамд л хатуу ширүүн үгс чулуудаж, нэг ч удаа ядарч байгаа эсэхийг нь асуудаггүй, тэгсэн мөртлөө хийсэн хоолыг нь идээд бас амт муутай байна гэж голоод, хүүхэд төрүүлж өгснийг нь юман чинээ санахгүй, байнга эхнэрээ хардаж сэрдэж дарамтлаж доромжилдог эрчүүд хорвоогоос тонилоосой. Тийм авир гаргаснаараа тэд эхнэрээ давруулахгүй, толгой дээрээ гаргахгүй байгаа мэт өөрсдийгөө дөвийлгөн ханхалзаж, бусад эрчүүдийнхээ өмнө гавьяа байгуулсан мэт авирлана. Ичиж амьдрах хэрэгтэй шүү, эрчүүдээ. Энэ бичлэг доор өөрсдийгөө өмөөрч хамгаалсан эрчүүдийн сэтгэгдэл орж ирэх байх, гэхдээ та нарын хэлсэн үг хэзээ ч тэр охины лазераар арьсаа зумлуулсны нэг хоромтой ч тэнцэхгүй. Хатуу ширүүн үгтэй бичлэг оруулсан ч би хэзээ ч энэ бичлэгийнхээ төлөө хэнээс ч уучлал гуйхгүй. Хувь хүний эрх чөлөөг хүндэтгэхээ мэдэхгүй, архи ууж эхнэр хүүхдээ тамлан зовоодог эрчүүд Монголд байгаа цагт би хэзээ ч эр хүнийг хүндлэхгүй.
|
