Дээр үед сэтгэцийн өвчтэй хүмүүсийг Шар Хадны эмнэлэгт хэвтүүлж эмчлүүлдэг байсан, одоо ч хэвээр байх. Ихэвчлэн бүтэлгүй дурлалаас нэг бол номын цагаан солионоос болж галзуурдаг байсан гэсэн. 21-р зуунд тэднээс өөр төрлийн галзуучууд их болсон гэсэн. Жишээ нь, бодит байдлаас зугатаж Фэйсбүүк ухаж өдөр хоногийг өнгөрүүлдэг хүмүүс олноор бий болсон. Амьдрал дээр гарч найз нөхөдтэйгээ цагийг өнгөрүүлэн, эсвэл гэр бүл зохиож бүрэн дүүрэн амьдралаар амьдрахаас айдаг мань мэт шиг хүмүүс Фэйсбүүкээр амьсгалдаг болсон. Энэ нь хүндрээд өвчин болоод байгаа.
Дараагийн нэг өвчлөл нь "насан туршийн оюутан" гэж нэрлэж болохуйц үзэгдэл. Тэд хэд хэдэн дипломтой, хажуугаар нь зөндөө олон курс дамжаа дугуйлан, төлбөртэй төлбөргүй семинар сургалтанд хамрагдаад, янз бүрийн жижиг сажиг сертификат олныг хураасан байдаг. Гэвч одоо ч гэсэн хаа нэгтэй магист, доктор хамгаалахаар суралцаж байгаа, бас хажуугаар нь гадаадад тэтгэлэгт хөтөлбөрт хамрагдах гээд хөөцөлдөж байгаа гэж таньд сонирхуулна. Ийм хүмүүс нөгөө л бодит амьдралаар амьдрах айдас түгшүүрээ дарж чадахгүй, бас өөртөө итгэх итгэл мөхөс учраас ийнхүү ширээний ард нуугдсаар байдаг.
Өөр нэг галзуучууд нь насан туршдаа хэн нэгнийг хүлээгсэд. Яг сэтгэлд нь бүрэн нийцсэн хүнтэй л хамтарч байж бизнесээ эхлүүлнэ, яг сэтгэлд бүрэн нийцсэн хүнтэй учирч байж л "хүүхэд шуухад, гэр бүл" гэж явна, яг сэтгэлд нийцсэн хүнтэй л хамт фитнесээр хичэллэнэ гэсээр нэг мэдэхэд хөгширсөн байдаг.
Зарим галзуучууд "төгс төгөлдөр"-ийн өвчнөөр өвчилсөн байдаг. Гэрээ гялалзтал нь цэвэрлэж байж л гадагш агаар салхинд гарна, ямарч өө сэвгүй үс засдаг үсчингээр л үйлчлүүлнэ, олигтой хийж чадахгүй бол эхлүүлээд ч яах билээ, нэгмөсөн 100% сэтгэлд хүрсэн шүлэг бичиж байж л анхны шүлгийн түүврээ хэвлүүлнээ гэх мэт ярьж байсан хүмүүс таны найз нөхдийн дунд байгаа л болов уу. Төгс төгөлдөрийг хайсаар байтал цаг хугацаагаа алдаад нэг мэдэхэд онгод нь орхиод явсан, авьяасаа тарамдаад хаясан байх вий.
|
2014-11-26 -